१९. सन्दर्भ : कोभिड - १९ विशेष कविता अध्यात्मिक जागरुकताको "अभ्युदय" मात्र हुनेछ अग्निपरिक्षामा "दिग्विजय" ।।
सन्दर्भ : कोभिड-१९ विशेष कविता अध्यात्मिक जागरुकताको "अभ्युदय" मात्र हुनेछ अग्निपरिक्षामा "दिग्विजय" ।।
 |
| 📝 वसन्तराज अधिकारी |
अध्यात्मिक जागरुकताको "अभ्युदय"
मात्र हुनेछ अग्निपरिक्षामा "दिग्विजय" ।।
सबैभन्दा पहिलो शुरुआत "जन्म"
जीन्दगीको अन्तिम क्षण "मृत्यु" ।
जन्म मृत्युको बिचको समय "जीवन"
यही परिधिभित्र भुलिरहेछ मानव "मन" ।। १ ।।
भनिन्छ मर्न साँच्चिकै "गाह्रो" छ
जीवन जीउन झन "साह्रो" छ ।
दु:ख र सुखको "संयोग" हो जीवन
आँसु र हाँसोको "मिलन" हो जीवन ।।२।।
जन्म पुर्व "अदृश्य" छ जीवन
मृत्यु पर्यन्त "अमुर्त" छ जीवन ।
विशाल सागरको "साघु" हो जीवन
प्रारब्ध कर्मले निर्धारित "आयु" हो जीवन ।।३।।
मानव शरीर "स्थुल" दृष्टिगोचर हुन्छ
वास्तवमा यो "सुक्ष्म" मै विनिर्माण हुन्छ ।
जाग्रत स्वप्न र सुषुप्त तीन "अवस्था" छ
सत्व रज र तम त्रिगुणात्मक "व्यवस्था" छ ।।४।।
प्रारब्ध जुन जन्मजन्मान्तर "भाग्य" बन्दछ
सत्कर्मले जीवनमा "पुरुषार्थ" भन्दछ ।
शिक्षा वृत्ति रोजाईको "स्वतन्त्रता" छ
जस्तो कर्म त्यस्तै फल "यथार्थता" छ ।।५।।
शास्त्र भन्छ मानव जीवन "पुन्य कर्मले" मिल्दछ
बिज्ञान भन्छ बाबुको "बिज र आमाको रजले" बन्दछ ।
मानव सृष्टि र सभ्यताको व्याख्या "मत मतान्तर" छन्
जन्मपछी मृत्यु निश्चित "पुर्नजन्म" शास्त्र प्रमाण छन् ।।६।।
मानिस सबै एउटै भएपनि "भूगोलले" छुट्याएको छ
सभ्यता बिकास धनी र गरिबी "खाडलले" बेग्ल्याएको छ ।
रगत सबैको रातो किन्तु बुद्धि "बाक्लो र पातलो" हुन्छ
सर्वश्रेष्ठ भनिएपनि मान्छे "पाशविकता" पालेको छ ।।७।।
सत्य त्रेता द्वापर र कलि "चार युग" छन्
धर्म अर्थ काम मोक्ष "चार पुरुषार्थ" छन् ।
स्वर्ग मर्त्य पाताल "तीन लोक" छन्
परन्तु मृत्युु पछि "सबै बियोग" छन् ।।८।।
जन्म र मृत्युु "शाश्वत सत्य" हुन्
अरु सब "माया जाल" मात्र हुन् ।
मानिसलाई बन्धन पार्ने "चाल" हुन्
जीवन् रूपी रंगमञ्चमा "महाजाल" हुन् ।।९।।
शोक गर्नु व्यर्थ छ भन्नेले स्वयं "शोक" गर्छन्
अरुलाई पाल्नेहरु स्वयं आफ्नै "पेट" भर्छन् ।
हजारौं पण्डितका मत "फरकफरक" छन्
जति मर्छन् त्यति "जन्मिरहेका" छन् ।।१०।।
विश्वमा धेरै थरी "महामारी" भए
हैजा, प्लेग, सार्स "अनेकन" थिए ।
प्रतिरोधात्मक क्षमता "बढदै" गैरहेछ
दुर्भिक्ष रोगलाई मानव "जित्दै" छ ।।११।।
भौतिक बिकासको "पराकाष्ठा"
जीवन बन्दैछ "निकृष्टता" ।
अध्यात्मिक जागरुकताको "अभ्युदय"
मात्र हुनेछ अग्निपरिक्षामा "दिग्विजय" ।।१२।।
~~~धन्यवाद ~~~ ✍️ रचनाकार : वसन्त राज अधिकारी स्थायी ठेगाना : घोराही उपमहानगरपालिका, दाङ रचना मिति : २०७७\०४\२४ शनिबार ।
Comments
Post a Comment